ഏറ്റവും ശ്രമകരമായ ഒരു ജോലിയെപ്പറ്റി
പറയാം..
എന്നെ സ്നേഹിക്കുക.
വെറുതെയങ്ങ് സ്നേഹിച്ചാലൊക്കില്ല.
നേരവും കാലവും മറന്നേക്കണം.
എന്റെ വിരലനക്കങ്ങളെപ്പോലും
നിരന്തരം വായിച്ചെടുത്തു ശീലിക്കണം.
നിങ്ങൾക്ക് അപ്രതീക്ഷിതമായി
ഞാൻ ചില്ലറ ജോലികൾ തന്നേയ്ക്കും.
എന്റെയൊപ്പം ഒരു പകൽസ്വപ്നത്തിന്
കൂട്ടിരിക്കുക,
എന്റെ പിറന്നാളിനെങ്കിലും
ഒരു പുസ്തകം സമ്മാനം തരിക.
ഇടയ്ക്കൊക്കെ
"നീ നന്നായി എഴുതുന്നു'വെന്ന്
'നിന്നെക്കൂടാതെ എനിയ്ക്കൊന്നും
സാദ്ധ്യമല്ലെന്ന്..'
'നീ എനിയ്ക്ക് പ്രാപ്യമായതിൽ വച്ച്
ഏറ്റവും നല്ല സ്ത്രീയാണെന്ന്'
വല്ലപ്പോഴും ഒരു കള്ളം പറഞ്ഞേയ്ക്കുക.
- എനിയ്ക്കതൊക്കെ നന്നായി രസിക്കും.
എന്റെ ഒഴിവുനേരങ്ങളിൽ നിന്ന്
അല്പം മാറിക്കിടക്കുക.
ഞാൻ രഹസ്യമായി സന്ദർശിക്കാറുള്ള
ചിലരെക്കുറിച്ചു ഞാൻ പറഞ്ഞു തരും
കേട്ടാൽ മതി..അങ്ങോട്ടൊന്ന്
എത്തിനോക്കുക പോലുമരുത്.
ഹൃദയത്തിന്റെ ഭാഷ വശമുള്ള മനുഷ്യരാണത്.
നിങ്ങൾക്ക് മനസിലായെന്നു വരില്ല.
എന്റെ കവിതകളിലെ 'അയാൾ'
നീയാണെന്ന്
ഞാൻ ഇടയ്ക്കിടെ പറയും.
അതിലല്പം സംശയം തോന്നുന്നുവെങ്കിലും
നിങ്ങൾ തലയുയർത്തിപ്പിടിക്കുകയും
എന്നോട് നന്ദിയുള്ളവനുമായിരിക്കും
- എനിക്കുറപ്പുണ്ട്.
ഭ്രാന്തിനു കുറിപ്പെഴുതുന്ന ഒരു
മുറിയെനിയ്ക്കുണ്ട്.
എന്നോടുള്ള പ്രേമത്തിന്റെ ഒരു ഘട്ടത്തിലും
അകത്തുകടക്കാൻ ശ്രമിക്കരുത്
- തോറ്റുപോകുന്ന നിങ്ങളെക്കാണാൻ
എനിക്കിഷ്ടമില്ലാത്തതുകൊണ്ടാണ്.
എന്റെ ബാഗിൽ
സ്നേഹം.. സന്തോഷം.. സമാധാനം
എന്നെഴുതിയ
കുറച്ചു കടലാസുകൾ കാണാം.
അത്രയും കുറച്ചുതവണകൾ മാത്രം
ഞാൻ സ്നേഹിക്കപ്പെട്ടിട്ടുണ്ട്.
അതിലിരട്ടിത്തവണയും നിർദയം
ഉപേക്ഷിക്കപ്പെട്ടിട്ടുണ്ട്.
മഞ്ഞുകാലത്തു മാത്രമാണ്
രാത്രികാലങ്ങളിൽ ഞാൻ
ഒറ്റയ്ക്ക് നടക്കാനിറങ്ങാറ്.
വിഷാദം മൂർച്ഛിച്ച് തിരിച്ചു വന്ന
എന്നെക്കാണുമ്പോൾ
ഒരു തകർന്ന കപ്പലിനുള്ളിലേയ്ക്ക്
നോക്കിയിരിക്കുന്ന കപ്പിത്താന്റെ
വേദനയുണ്ടാകും നിങ്ങളുടെ മുഖത്ത്.
ഒന്നും മിണ്ടാതെ പലതവണ
അസ്വസ്ഥമായ ഉറക്കത്തിന്റെ
സമയപ്പാലത്തിനു കീഴിലേയ്ക്ക്
ഞാൻ നൂണ്ടിറങ്ങിപ്പോകും.
ഇപ്പോൾ ഒരു കാഴ്ചക്കാരന്റെ ജോലിയാണ്
നിങ്ങൾക്ക്.
ഉറക്കം വിട്ടെഴുന്നേൽക്കുമ്പോൾ
നിങ്ങൾ അമ്പരന്നേക്കും.
ഞാൻ എന്നത്തേക്കാളും നിങ്ങളോട്
അലിവുള്ളവളും സുന്ദരിയുമായി കാണപ്പെടും.
വീണ്ടുമതൊക്കെയും ക്രമം തെറ്റി
ആവർത്തിച്ചുകൊണ്ടേയിരിക്കും.
നിങ്ങളൊരേ സമയം ചിരിക്കുകയും
കരയുകയും ചെയ്യും.
എന്നെയോർത്ത് സമാധാനപ്പെടുകയും
തൊട്ടടുത്ത നിമിഷത്തിൽ
സ്വസ്ഥത നശിച്ച് എന്നെവിട്ടോടിപ്പോവുകയും
ചെയ്തേക്കും.
പക്ഷേ..എനിയ്ക്ക് തീർച്ചയുണ്ട് - ഒരിക്കലെന്നോട് പ്രേമത്തിൽപ്പെട്ട
നിങ്ങൾക്ക് തിരിച്ചുവരാതിരിക്കാനാവില്ല.
നോക്കൂ..,
എന്റെ സ്നേഹത്തിന്റെ ഏറ്റവും വിശ്വസ്ഥനായ ഇടപാടുകാരനായിരിക്കണം നിങ്ങൾ.
അമ്പേ തോറ്റുപോയൊരുത്തിയെ
സ്നേഹിക്കുകയെന്നതിൽക്കൂടുതൽ
ശ്രമകരമായ മറ്റെന്തുണ്ട് നിങ്ങൾക്ക്..?
