പുക നിറഞ്ഞാൽ
അടുക്കളയിൽ കാണില്ല ഉമ്മയെ.
നനവിനെ ഊതി മന്ത്രിച്ച്‌
അകത്തെ നിശ്വാസം
അടുപ്പോളം ചെല്ലുന്നുണ്ടാകും.
ആയുസ്സോളം നീളം കൂടിയ
ചുണ്ടുകളാൽ
പിറക്കും മുൻപേ
ഉണർന്നു കാണും
ഉടുമുണ്ടില്ലാത്ത
അയക്കോറ പോലെ
ഉറിയിലാടും അടുക്കളയെ.
എന്നാലും ഇല്ലാത്തത്‌ പെരുപ്പിച്ച്‌
കത്തിക്കില്ല എന്റെ ഉമ്മ.
വിഭവം നിരന്നാൽ
ഉള്ളം പീടയുന്നുണ്ടാകും
പഴിയെ പേടിച്ച്‌
പേടിച്ച്‌
അമ്മിക്കല്ലിൽ ഇഴഞ്ഞ്‌
അയലിൽ ഉലഞ്ഞ്‌
വെളുക്കാതെ അലക്കുകല്ലിലും
അന്തിപ്പാതിരയ്ക്ക്‌
കിണറ്റുവക്കിൽ
ജീവിത ആഴങ്ങളെ
കരക്കെത്തിക്കാൻ
ഏന്തി ഏന്തി വലയുന്നുണ്ടാകും.
-----------------------------------
No comments:
Post a Comment