മേലിലെന്നെ
കുഞ്ഞെറുക്കാന്ന്
വിളിച്ചു പോകരുത്‌.
ഞാനിപ്പോ മോഹൻ ദാസാണു.
കുഞ്ഞെറുക്കാ....ന്ന്
പുറകീന്നാരു വിളിച്ചാലും
ഞാനിനിമേൽ
തിരിഞ്ഞു നോക്കുകേല
നേരേ വന്നു വിളിച്ചാലും
കണ്ടഭാവം നടിക്കില്ല ഞാൻ
പറഞ്ഞില്ലെന്നു വേണ്ട.
കുഞ്ഞെറുക്കനിപ്പോ
ജീവിച്ചിരിപ്പില്ല
എന്നാ മോഹൻ ദാസ്‌
ജീവിച്ചിരിക്കുന്നു.
മറ്റുള്ളോരുടെ
കണ്ണിലെ കരടെടുക്കൽ
കുലത്തൊഴിലാക്കിയവർക്ക്‌
ഉറക്കം തിരികെകിട്ടാൻ
സർക്കാരുഗെസറ്റ്‌
പരിശോധിക്കാവുന്നതാണു.
എന്റെ ചാച്ചൻ
കുഴിത്തറ പൈ ലിയും
അമ്മച്ചി ഏലിയും
മണ്ണോടു മണ്ണായിട്ട്‌
കാലമെത്രയായ്‌,
തോട്ടുചെറേലെ
ഓലപ്പെരപോയിട്ട്‌
ഇപ്പോഴവിടെ
ഒരുതരി മണ്ണുപോലുമില്ല.
പിന്നല്ലേ
അവിടെ പണ്ടെങ്ങോ
തെങ്കരകൊട്ടി നടന്ന
ഒരു കുഞ്ഞെറുക്കൻ.
----------------------------
No comments:
Post a Comment