മരിച്ചവരുമായി സംസാരിക്കൽ / സച്ചിദാനന്ദന്‍

എല്ലാവരും ഉറങ്ങുമ്പോൾ
സ്കൈപ് തുറക്കുക
സ്കൈപ് ഐഡി: മരണം
മൂന്നുമിനിറ്റ് ഹൃദയമിടിപ്പ്
നിർത്തിവെച്ചു ധ്യാനിക്കുക.
മരിച്ചവർ അവരുടെ
നമ്പറുകളോടെ പ്രത്യക്ഷരാവും
ലാപ്ടോപ് ഒരു മോർച്ചറിയാണെന്നു
തോന്നുന്നത് വെറുതെ.
മരിച്ചവരുടെ പിന്നിൽ
എന്താണെന്ന് നോക്കൂ:
അവർ സ്വർഗ്ഗത്തിലാണെങ്കിൽ
സ്വർണംകൊണ്ടുള്ള അഴികളും
വജ്രംകൊണ്ടുള്ള തോക്കുകളും കാണും
നരകത്തിലാണെങ്കിൽ
തീപിടിച്ച ഒരു നിഘണ്ടുവും
അറ്റുപോയ ഒരു പാലവും.
മരിച്ചയാൾ കവിയെങ്കിൽ
ഒരു വരിക്കുള്ളിൽ
മാറിയ അർത്ഥങ്ങളോടെ പ്രത്യക്ഷപ്പെടും
ശാസ്ത്രജ്ഞനെങ്കിൽ താൻ കണ്ടുപിടിച്ചതെല്ലാം
മാറ്റി എഴുതുന്നതായി കാണും
താൻ പറഞ്ഞതെല്ലാം നുണയായിരുന്നെന്നു
തിരിച്ചറിഞ്ഞ വിവേകിയുടെ മുഖം കണ്ടാൽ
അതൊരു പുരോഹിതനാണെന്നുറപ്പിക്കാം
ചിത്രകാരന്മാർ പാലറ്റുകളായിമാറിയ
മഴവില്ലുകളുടെ ചുമലിലാണ്‌ സവാരി
അനന്തതയിലായതിനാൽ ഒന്നും
എഴുതാനില്ലാതായതിന്‍റെ
മങ്ങൂഴത്തിലാണ്‌ ചരിത്രകാരന്മാർ
പ്രണയികൾക്കു മാത്രം മാറ്റമില്ല;
അതേ അതിശയോക്തികൾ
ചളുങ്ങാത്ത അതേ തങ്കക്കുടം
ഓട്ട വീഴാത്ത അതേ ഓമന.
ഇനി സംസാരിച്ചോളൂ
നിങ്ങളും മരിച്ചിരിക്കുന്നു.
---------------------------------------------------