കരകൗശലക്കാരി/കല സജീവൻ

അമ്മയ്ക്ക് മുറം കൊണ്ട്
വൃത്തിയായി ചേറാനറിയാമായിരുന്നു.
അരി, പയർ, പരിപ്പ്, പിന്നെ ധാന്യരൂപത്തിലെന്തും.
ചേറൽ കാണാൻ നല്ല രസം
അരിമണിയെല്ലാം ഒറ്റയാച്ചലിൽ മുകളിലേക്ക്,
നൊടിയിട അനിശ്ചിതത്വത്തിൽ ----
പിന്നെ ചിക്കെന്നു മുറത്തിലേക്ക് -
ചേറൽ മാത്രല്ല കൊഴിക്കലുമുണ്ട്.
നല്ലതെല്ലാം ചേറിയെടുക്കാനും
ചീത്തയെല്ലാം കൊഴിച്ചു കളയാനും
അമ്മയ്ക്കറിയാമായിരുന്നു -
എത്ര വട്ടം ചേറിയിട്ടും
ഒന്നും കൊഴിക്കാനറിയാത്തൊരു ഞാൻ -
കരത്തിലൊരു കൗശലവുമില്ലാതെ ----
കല്ലും നെല്ലുമവിലും കൂടിക്കുഴഞ്ഞൊരു മുറവുമായി നാളെത്രയായി ഇരിക്കുന്നു.
______________________________________