ഒരു വിരലകലം / ഉമാ രാജീവ്

ഒരു കൈ പതുക്കെ ഇഴഞ്ഞു വന്ന്
ഒരുപാടിടങ്ങളിൽ തൊട്ടപോലെ
ഒരു നോട്ടം മുനവച്ചു കൂർത്തു നിന്ന്
ഓർമയിലേക്കൂളിയിട്ടപോലെ
ഒരു വാക്ക്, ഇല്ലൊരു മൂളൽ കൊണ്ട്
ഒറ്റത്തുരുത്തിൽ വേർപെട്ടപോലെ
ഒന്നുമില്ലാതെയും ഓങ്ങി വച്ചും
ഒരു ജന്മം കൂടെക്കിടന്ന പോലെ

ഒപ്പമുണ്ടെന്നതു തോന്നലാണോ?
ഒപ്പമാണെന്നതും തോന്നലാണോ ?

ഇടയിലൊരു വരി മാഞ്ഞുപോയ
ഇഷ്ടകവിതയായ് നമ്മളിപ്പോൾ
ഒറ്റ നോട്ടത്തിൽ കുഴപ്പമില്ല
ഓർത്തെടുക്കാനത്ര പാടുമില്ല
എന്നിട്ടുമെന്തൊരു  വിരലകലം
ആയത്തിൽ ഈണത്തിൽ പാടിപ്പോകെ
ഒച്ച താഴ്ത്തീടുവാൻ മാത്രമായി ?
________________________________