മാലാഖയുടെ സ്വപനത്തിലേക്കുണരുന്നത് ../ സുധീർ രാജ്

ഓരോ മുറിയിലും
കുഞ്ഞുങ്ങൾ ഒളിച്ചിരിപ്പുണ്ടെന്നാണ്
അവളോടു പറഞ്ഞിരിക്കുന്നത് .
പകലും കുഞ്ഞുങ്ങളും
അവളുമൊന്നിച്ചുള്ള ഒളിച്ചുകളി.
"കണ്ടേ "
"തൊട്ടേ "

രാത്രിയിലാണവൾ അന്ധയാവുക .
മക്കളെത്തിരഞ്ഞ് മുറികളിലൂടെ ,
എന്നിലൂടലയും .
അവളുടെ കണ്ണീരു പേടിച്ച്
രാത്രി ഒളിച്ചിരിക്കും .
എന്നിട്ട് ,
നിലാവിന്റെ കുഞ്ഞുങ്ങളെ മെനഞ്ഞ്
അവളുടെ മടിയിലേക്കു വിടും .
ഞാൻ ,
അവൾക്കായെഴുതുന്ന കവിതയിലെല്ലാം
കുഞ്ഞുങ്ങളെ നിറയ്ക്കും .
എങ്കിലും ,
ഒറ്റവരികളിൽ പോലും
പിഞ്ചുകാലടയാളം കാണില്ല .
മരിച്ചു പോയ കുഞ്ഞുങ്ങളും
ജനിക്കാനിരിക്കുന്ന കുഞ്ഞുങ്ങളും
അദൃശ്യരാവുന്നതെങ്ങിനെ ?
അവളിലവർ വെളിപ്പെടാത്തതെന്ത്.
ഇങ്ങനെയവളുറങ്ങിപ്പോകും
കുഞ്ഞുകൈകൾ പൂക്കൾ വിതറുന്ന
താഴ്വരയിലുറങ്ങിക്കിടക്കുന്ന
മാലാഖയുടെ സ്വപനത്തിലേക്കുണരും വരെ
അവളുറങ്ങിക്കിടക്കും .
----------------------------------------