തൂതപ്പുഴ കടക്കുമ്പോൾ
പഴയ പാലത്തിനു നടുവിലൊരു
കടും കുടും ശബ്ദം
ജില്ല മാറുന്നതിന്റേതാണെന്ന്
അച്ഛൻ പറഞ്ഞുതന്നു
വലുതായി
പനാമാ കനാൽ കടക്കുമ്പോൾ
ഇരുമ്പുഗേറ്റുകളുടെ
കടും കുടും ശബ്ദം
സമുദ്രങ്ങൾ മാറുന്നതിന്റേതാണെന്ന്
ക്യാപ്റ്റൻ പറഞ്ഞുതന്നു
ഇരുകരകൾ ചേരുന്ന പാലവും
ഇരുകടലുകൾ ചേരുന്ന തോടും
രണ്ടുമോർത്തന്നുനിൻ
കൈ പിടിക്കുമ്പോൾ
ഇടനെഞ്ചിൽ വീണ്ടുമൊരു
കടുംകുടും ശബ്ദം
നമ്മൾ കടലിലോ കരയിലോ
നമുക്കിടയിലിനി
കെട്ടേണ്ട പാലമോ
വെട്ടേണ്ട തോടോ..?
-----------------------------
No comments:
Post a Comment