കുരുതി / ഹണി ഭാസ്കരൻ

ഇരുട്ടിൽ ഉറങ്ങുകയും
ഇരുട്ടിൽ ഉണരുകയും ചെയ്യുന്ന
ജീവിതത്തിന്റെ നിറങ്ങൾ
കൂട്ടിത്തുന്നുന്ന
മുഷിഞ്ഞ വഴികൾ....
വെന്തു തൂവുന്ന വെയിലോ
ഉറഞ്ഞടരും മഞ്ഞോ
അവരെ പൊതിയുന്നത്
അവരറിയുന്നേയില്ല.
പാർക്കുകളിലോ
മൈതാനങ്ങളിലോ
പുണർന്നു ചായുന്ന
മെയ് ത്തളർച്ചയോ
നോട്ടങ്ങളുടെ വൃത്തത്തിനു നടുവിലെ
ഗോതമ്പ് നിറമുള്ള ഉടലാട്ടമോ
മാംസം ഉരുകുന്ന
ബാർബിക്യൂ പന്തലുകളോ
കാണുന്നേയില്ല.
എങ്കിലും
കൊടികൾ തല തിരിഞ്ഞു പാറുന്നതും
പ്രാർത്ഥനകൾ തെറ്റി ഉരുവിടുന്നതും
നിയമങ്ങൾ പിഴച്ചു പെറുന്നതും
കറുത്ത കുതിരകൾ
ചുവന്ന തീരങ്ങളിൽ
ചിനച്ചുകൊണ്ടോടുന്നതും
അവർ കാണുന്നുണ്ട്.
ഓരോ കുളമ്പു മൂർച്ചയും
തറച്ചു പായുന്നത്
തിരസ്ക്കരിക്കപ്പെട്ടവരുടെ
നിലവിളികളുടെ മീതെ കൂടിയെന്ന്
അവരെ ഓർമ്മപ്പെടുത്തുന്നുണ്ട്.
തിരസ്കാരമൊരു
കുരുതിയാണ്.
-------------------------------------