മന്ത് വേണം, വെറും കാലില്‍
രണ്ടിലേതില്‍-അതേ ചോദ്യം!
മന്തുവേട്ടക്കാര്‍ വരുമ്പോള്‍
മന്തുകൂടാതിരുന്നൂടാ.
ഏതുകാലില്‍ മന്ത് വേണം?
ഏതു വേണം -ഇടം? വലം?
കാലുരണ്ടേ തനിക്കുള്ളൂ,
ആയതൊന്നില്‍ നിജം വേണം.
നാടുനീളെ പെരുമന്തന്‍-
കാല്‍വലിച്ചു നടക്കുന്നോര്‍,
നൂറുജന്മകൃതംപോലെ
ഗോപുരങ്ങള്‍ വലിക്കുന്നോര്‍,
ആന, തേര്, കൊടിമരം
കാടിളക്കി നടക്കുന്നോര്‍,
ആനകേറാമല നോക്കി
ആണി നൊന്ത് വിളിക്കുന്നോര്‍.
ഏതുവേണം -ഇടം? വലം?
ചോപ്പ്? ചോപ്പാവാത്തതെല്ലാം?
ഏതു -തൂക്കുകയര്‍? തോക്ക്?
കൊല, വഞ്ചന -ഇതില്‍ ഒന്ന്?
ഏതു - വാഴ്ത്തല്‍? പെരും വീഴ്ത്തല്‍?
ഏതു -സദ്യ, ഉപവാസം?
ഏതു -ദേവി? പിശാചിനി?
ഭാര്യ? തെരുവിന്‍ കാമുകി?
ഏ -തൊരുത്തരമനിവാര്യം
നേരമില്ലാ -വെറും ചോദ്യം.
മന്ത് വേണ്ടാ, വെറും കാലില്‍
സഞ്ചരിക്കണമെന്നൊരാള്‍
എന്തുകൊണ്ടോ അവന്‍ ഒറ്റ
രണ്ടുപക്ഷം; നടുക്കായോന്‍.
-----------------------------------
No comments:
Post a Comment