ഒരു പകൽ, ഒരു രാത്രി / രാമചന്ദ്രൻ വെട്ടിക്കാട്ട്

ജീവിതത്തിൽനിന്ന്
മായ്ച്ച് കളയാനൊരു പകലുണ്ട്
പെരുമഴത്തണുപ്പിൽ
ചുണ്ടോട് ചുണ്ട് ചൂട് പകർന്നൊരു പകലിനെ
മായ്ക്കുന്തോറും തെളിഞ്ഞുവരുന്നത്.
ജീവിതത്തിൽനിന്ന്
മായ്ച്ച് കളയാനൊരോർമ്മയുണ്ട്,
പ്രണയമെന്നെന്നെ
നുണകളിലൂടെ നടത്തിയൊരു
കാലത്തിന്റെയോർമ്മയെ
മറക്കുന്തോറും ഓർത്ത് പൊള്ളിക്കുന്നത്.
ജീവിതത്തിൽനിന്ന്
മായ്ച്ച് കളയാനൊരു രാത്രിയുണ്ട്,
കണ്ണടച്ചിരുട്ടാക്കിയാലും
ഇരുണ്ടുപോകാത്ത രാത്രിപോൽ
മരണംപോലെ വിശ്വസിച്ച് പോന്നത്.
ജീവിതത്തിൽനിന്ന് മായ്ച്ച്
കളയാനൊരു ജീവിതമുണ്ട്,
ജീവിതമാണെന്ന് തോന്നിപ്പിച്ച
നുണകളുടെ കാലത്തെ.
ജീവശ്വാസംപോലെ വിശ്വസിച്ച് പോന്നത്.
ജീവിതം നുണയാണെന്നറിഞ്ഞിട്ടും
മായ്ച്ചിട്ടും മായ്ച്ചിട്ടും മായല്ലേയെന്ന്
നുണഞ്ഞിറക്കിയ കുന്നോളം നുണകളിൽ
കൂടെച്ചേർത്തുപിടിക്കുന്നുണ്ട്
അന്നത്തെ പകലിനെ,
അന്നത്തെ രാത്രിയെ,
ചോർന്നൊലിക്കുന്ന നിഴലുകളെ.
----------------------------------------------