ഒരു ഫാസിസ്റ്റ് മൌനം / ഹരിത ഉണ്ണിത്താൻ

അത്താഴമുണ്ണാൻ
ഇരുന്നപ്പോഴാണ്
വായ അപഹരിക്കപ്പെട്ടതു പോലും
തിരിച്ചറിയുന്നത് ;
പാട്ടു തുടങ്ങിയപ്പോൾ കാതും .
എന്റെ വർണ്ണത്തിലും ഗന്ധത്തിലും
കള്ളൻ കയറി ,
ബഹുമാനപ്പെട്ടവരേ, എന്ന് പറയാനായ്
തട്ടിൽ കയറിയപ്പോഴേക്കും
നാവ് കടലെടുത്തു പോയ്‌ ;
ചിരിച്ചു തലതല്ലിച്ചത്ത
ഒരു കോമാളിയാണ് നട്ടെല്ല് .
ഞാൻ ഞാനേ അല്ലാത്തതിനാൽ
ഇതിനൊക്കെ ഞാൻ എന്തു വേണം .
-----------------------------------------