മഞ്ഞുതുള്ളിപോല്‍
നറുംമഞ്ഞുവീണലിയുന്ന-
കുഞ്ഞു പൂവുപോല്‍
പൂവിന്‍ പിഞ്ചിതള്‍തരിപോലെ
ദൂരെദൂരെ നിന്നെത്തും
സൌമ്യമാം സുഗന്ധത്തില്‍
ഗൂഢമായ്‌ മയങ്ങുന്നോ-
രോര്‍മ്മപോല്‍ വിഷാദം പോല്‍
ഗീതിക നിലയ്ക്കവേ
നേരിയ വീണാനാദം
കേണു കേണലിഞ്ഞൂറും
വായുവിന്‍ സ്പര്‍ശം പോലെ
നീരവ വിശാലമാം
കായലിന്‍ തോണിക്കുള്ളില്‍
പാതിരാമയക്കത്തില്‍
ഞെട്ടിയ പാന്ഥന്‍ കാണ്‍കെ
ശ്യാമള പ്രപഞ്ചത്തിന്‍
സീമയില്‍ ഘനശ്യാമ-
രേഖയാം തീരത്തെങ്ങോ
മിന്നിടും ദീപം പോലെ.....
ഓതുവാനാവില്ലല്ലോ
ഭാഷതന്‍ മുനയെങ്ങാന്‍
ഏശിയാല്‍ പിഞ്ചിപ്പോകും
സ്നിഗ്ദ്ധതേ നിന്നെപ്പറ്റി.
ഭദ്രമെന്‍ വാൽസല്യത്തിന്‍
പൂഞ്ചിറകൊതുങ്ങുന്നു
നിത്യവും പാറുന്നൂ ഞാന്‍
മുഗ്ദ്ധതേ നിന്നെച്ചുറ്റി.
-------------------------------
No comments:
Post a Comment