ചില നോവുകളുണ്ട്‌... / ദേവി മനോജ്

കൈ പിടിച്ചു നടത്തുന്ന
ചില നോവുകളുണ്ട്‌
മുറിവായിൽ നിന്നും
ഇപ്പോഴും നിണമൊഴുകുന്ന
ചില ഓർമ്മപ്പാടുകൾ
ചില ഓർമ്മകൾക്ക്
ഭസ്മത്തിന്റെ മണമാണ്
അടുത്ത് വന്ന്
വെറ്റിലക്കറയുള്ള ഉമ്മകൾ തരും
അപ്പോൾ
രാക്ഷസൻ പിടിച്ചു കൊണ്ട് പോയ
സുന്ദരിയായ രാജകുമാരിയുടെ കഥ
കാറ്റിൽ അങ്ങിനെ പറന്നു പറന്നു വരും
അതിന്റെ ചിറകുകളിലേറി
ആകാശദൂരങ്ങൾ താണ്ടി
സ്വപ്നക്കൊട്ടാരത്തിൽ
രാജകുമാരിയോടൊപ്പം വാഴും
പക്ഷെ
പെട്ടെന്നൊരു കൊഴിച്ചിലാണ്
ചിറകറ്റു വീണ്ടും ഭൂമിയിൽ
ചില നോവുകൾക്ക്‌ പാൽമണമാണ്
ദുഖത്തിന്റെ ചില്ലകളിൽ
ചേക്കേറുമ്പോൾ
പാൽമണമുള്ള ഉമ്മകൾ
കവിളത്ത് തുരുതുരെ തരും
നെഞ്ചോടു ചേർത്ത് ലാളിക്കും
'ഓമനത്തിങ്കൾക്കിടാവോ ' പാടും
പക്ഷെ
മയക്കത്തിലേക്കു വഴുതി വീഴുന്നതും
തൂവൽ പോലെ പറന്ന്
മറഞ്ഞു പോകും
ചില ഓർമ്മകൾക്ക്
അമ്പലപ്രാവിന്‍റെ ചിറകടിയൊച്ചയുണ്ട്
കുറുകിയും കുണുങ്ങിയും
മനസ്സിനുള്ളിൽ കൂട് വച്ച കുറുമ്പിപ്രാവ്
ഇടയ്ക്കിടയ്ക്ക് ചിറകടിച്ചു പൊങ്ങും
അമ്പലവഴിയിലൂടെ
കുളക്കടവിലൂടെ
പാറി പാറി നടക്കും
കൊക്കുരുമ്മി കൊഞ്ചും
പിന്നെ പിണങ്ങി പറന്നു പോകും
ചില ഓർമകൾക്ക്
സ്നേഹം പുരണ്ട
കരുതലുകളുടെ രൂപമാണ്
ഇരുളിന്‍റെ ചായം പുരളുന്നതിന് മുൻപ്
കൂടണയാത്ത കിളിക്കുഞ്ഞുങ്ങളെയോർത്ത്
അസ്വസ്ഥമാകുന്ന സ്നേഹം
ആ ചിറകിനുള്ളിൽ കിനിയുന്ന
വാത്സല്യം
ആൾക്കൂട്ടത്തിന്‍റെ ഏകാന്തതകളിൽ
കൈ പിടിച്ചു നടത്തുന്ന നോവുകൾ .
-------------------------------------------