മറവിതൻ മാറാല മറയായ്‌ നിറഞ്ഞെങ്കിൽ
അറിവില്ല,അറിയില്ല,അഴലുമില്ല
അവടെയെൻ പ്രിയയില്ല,പ്രിയരില്ല,പ്രിയമില്ല
പ്രിയരാഗമുണരും പൊൻ വീണയില്ല.
മഴവില്ലിനഴകില്ല,മധുവില്ല, മണമില്ല
മിഴിവില്ല,കദനക്കടലുമില്ല
പുഴയില്ല,പൂവില്ല,പുഞ്ചിരിക്കുളിരില്ല
പഴമ്പാട്ടിശലില്ല,പുള്ളോർക്കുടവുമില്ല.
പിടയുന്നൊരകതാരിനടിവേരു മുറിയില്ല
വിടരില്ല പുതുപൂക്കൾ, പുളകമില്ല
ഓളങ്ങളുണരില്ല,ഒളിമിന്നൽ തെളിയില്ല
കളിയില്ല, കളിയോടത്തുടിയുമില്ല.
അടരില്ല,ആശാകിരണങ്ങൾ വിടരില്ല
കിടയറ്റ കിടമത്സരങ്ങളില്ല
അന്തിമേഘങ്ങളിൽ ചെന്നിറം ചാർത്തില്ല
ചന്ദനക്കുളിരില്ല; സാന്ധ്യരാഗം!
ഇഷ്ടങ്ങളൊട്ടുമില്ല,അനിഷ്ടങ്ങളില്ലില്ല
കഷ്ടവും നഷ്ടവുമൊട്ടുമില്ല
നിർവ്വികാരത്തിൻ നിതാന്ത ഘോഷം പിന്നെ
ഉർവ്വിയിൽ ഊഷരം ശിഷ്ടജന്മം.
-------------------------------------------------
No comments:
Post a Comment