ഒരിത്തിരി മണ്ണ്
അതില്‍ ചെറിയൊരു കൂര
ഒരു കുഞ്ഞുവീട്
രണ്ടുമുറികളും
ഒരു ചായ്പുമുള്ളത്.
ഒരുമുറി ഉറങ്ങാന്‍
ഒരു മുറി നിറയെ പുസ്തകങ്ങള്‍..
ചായ്പില്‍ പാചകം.
വരാന്തയില്‍
ഒരു ബെഞ്ചും ഡസ്ക്കും
പൂക്കളെ നോക്കിയിരിക്കാന്‍.
ഒറ്റക്കല്ലിന്‍റെ പടി.
വീതികുറഞ്ഞ മുറ്റം
നിറയെ പൂച്ചെടികള്‍
ചെണ്ടുമല്ലിയും മുല്ലയും
നന്ത്യാര്‍ വട്ടവും നാലുമണിയും
മഞ്ഞപ്പൂക്കളുള്ള കോസ്മസും
പനിനീരും വെള്ളമന്ദാരവും
അങ്ങനെയങ്ങനെ......
നാലതിരിലും
ശീമക്കൊന്നകളുടെ
വസന്തം.
ഇടയ്ക്ക് കടും ചുവപ്പന്‍ ചെമ്പരത്തിയും.
മുറ്റത്തെ പന്തലില്‍
കോവല്‍ മണികള്‍
അടുക്കളക്കോണില്‍
കറിവേപ്പും നിത്യവഴുതിനയും.
നാലടി ചതുരത്തില്‍
ഒരു ചീരത്തട്ട്.
അതിനുള്ളില്‍ കുറച്ച് വെണ്ടത്തൈകള്‍
പത്തുമൂട് കപ്പ
ഒരു പപ്പായമരം.
നിറയെ ജലമുള്ള ഒരു കിണര്‍.
അതിലൊരു ചകിരിക്കയറും തൊട്ടിയും.
കോരിക്കുളി.
കുളിക്കുമ്പോള്‍ രണ്ടുകവിള്‍ കുടിക്കും
ഒരൊറ്റത്തെങ്ങുമതി
കുളിവെള്ളം വലിച്ചെടുക്കാന്‍ മാത്രം.
മതി...
എഴുതാന്‍ കഴിയുന്നത്
വലിയൊരു ഭാഗ്യമാണ്.
കാരണം
ഉണര്‍ന്നിരുന്ന്
ഞാനും അവളും
ഒന്നിച്ചുറങ്ങിയ വീടിനെപ്പറ്റി
ഒരിക്കലും പറഞ്ഞിട്ടില്ല.
വെറും
സ്വപ്നമായിട്ടും.!
No comments:
Post a Comment