പട്ടുതോല്‍ക്കുമിരുട്ടിലേക്കാണു ഞാന്‍
ഞെട്ടിയേല്‍ക്കുന്നതിന്നീ രജനിയില്‍
രാമഴ പെയ്തു തോര്‍ന്നതിന്‍ മന്ത്രണം
മാമരങ്ങളുതിര്‍ക്കുന്ന വേളയില്‍.
ഈയഴകിന്‍ മുഹൂര്‍ത്തത്തിലെത്തിയോ
നീയിവിടെ വിരുന്നിനായ് ദുഃഖമേ ?
ആനയിച്ചുവോ തീക്കനല്‍ കോരിയി-
ട്ടാരവത്തോടെ, നിന്നെയീ വാതിലില്‍
മറ്റൊരുള്‍ക്കളം താങ്ങിയ വേദന
മറ്റൊരാളെക്കവര്‍ന്നതാം പീഡകള്‍ ?
നേരനുഭവസാക്ഷ്യകാലത്തിലെ
വേദനയെ കവച്ചിടുമോര്‍മ്മകള്‍...
കെട്ടഴിയുന്ന ഹൃത്തിന്റെ താഴുകള്‍
പൊട്ടിവീണു തകര്‍ന്നു കഴിഞ്ഞുവോ?
കണ്ണുനീരിന്‍ പ്രളയകവാടമോ
നിന്നനില്‍പ്പില്‍ തുറന്നു കാണുന്നു ഞാന്‍?
രക്തപാശമൊന്നേത് ? എന്‍റെ സൌഹൃദ-
ഭക്തിയാര്‍ന്നു വരുന്നിതാ മുന്നിലായ്.
ലോകജീവിതസത്യമേ വേദന-
യേകമെന്നതു വീണ്ടുമോര്‍മ്മിക്കുവാന്‍
എതഴകിന്‍ കിനാവിലും നിര്‍ദ്ദയം
നീ വിരുന്നിനായെത്തുന്നു ദുഃഖമേ !
പട്ടുതോല്‍ക്കുമിരുട്ടിലേക്കാണു ഞാന്‍
ഞെട്ടിയേറ്റതിന്നീ നീലരാത്രിയില്‍
രാമഴ പെയ്ത രാഗമന്ത്രങ്ങളെ
മാമരങ്ങളുതിര്‍ക്കുന്ന വേളയില്‍.
----------------------------------------
No comments:
Post a Comment