കത്തിയേറ് / സച്ചിദാനന്ദന്‍.

പേടിക്കരുത്
കണ്ണടയ്ക്കുകയുമരുത്.
ഓരോ കത്തിയും
ഓരോ പൂവായി സങ്കല്‍പ്പിക്കുക.
ഇതാ വരുന്നു ഒരു സൂര്യകാന്തി
ഇതു ജമന്തി, ഇതു പിച്ചകം
ഇതു ചെമ്പകം.
ഇതാ ഒരു താമരയിതള്‍
ഇതാ മുല്ലമൊട്ടിന്‍റെ ഒരു കുല
ഇതാ ചുകചുകന്ന കാര്‍ണേഷന്‍
ഇതാ ഓര്‍ക്കിഡിന്‍റെ ഒരു വയലറ്റ് ചില്ല.
ചോരവരുന്നുണ്ടോ?
അതു ചെമ്പരത്തിയിതളുകളാണ്
വേദനിക്കുന്നുണ്ടോ?
അതു പനിനീര്‍ മുള്ളുകളാണ്
ഈ കണ്ണിന്‍റെ കെട്ടൊന്നു ഞാനഴിച്ചോട്ടെ
നീയെന്താണു പരാതി പറയാത്തത്?
ഇതു മരണമല്ല, ജീവിതമാണ്
നമ്മുടെയൊക്കെ,ചോരയിറ്റുന്ന
ജീവിതം
--------------------------------------