ഒരല്‍പനേരത്തേക്ക്
മറ്റൊരാളാകുവാന്‍
തീവണ്ടിയിലൊരു പകല്‍സഞ്ചാരം.
അപരിചിതര്‍ക്കുമുന്നില്‍
ഏറെ പരിഷ്കൃതയാകും.
കടലുണ്ടിയിലെ പക്ഷികളെ
വറ്റിവരണ്ട നിളയെ
വിദേശിയായി തിരയും.
ദുഷിച്ച ഏതെങ്കിലും ഒരോര്‍മ
ചങ്ങല വലിക്കുംവരെ
പഴയ ചില കുറ്റിക്കാടുകള്‍ കയറിയിറങ്ങും.
യാചകര്‍ക്ക് കരുണ
അശരണര്‍ക്ക് അനുകമ്പ.
പുറത്ത് പിന്നിട്ട ആകാശങ്ങള്‍ കണ്ട്
രഹസ്യമായി അഹങ്കരിക്കുമ്പോഴാവും
ഇതേ തീവണ്ടി തട്ടി
രണ്ടായി പിളര്‍ന്നവര്‍
നിലവിളിയായെത്തുക.
അടുത്ത സ്റ്റേഷനിലിറങ്ങി
ബസില്‍ കയറി
പഴയ ഞാനാകും
തിരികെ പോരും.
--------------------------------------------
No comments:
Post a Comment