പാർട്ടി കോണ്‍ഗ്രസ് / സുധീർ രാജ്

കർക്കിടകപ്പാടങ്ങളിൽ പണിയെടുക്കുന്ന
മഴത്തൊഴിലാളി കളുടെ സമ്മേളനത്തിലും
അപ്പൻ അലമ്പിയെന്നു കേട്ടു.
മഴവില്ലിനു ഇവിടെന്തു കാര്യം
എന്നുറക്കെ പറഞ്ഞത് മിന്നലിനു പിടിച്ചില്ല
ഒന്നും രണ്ടും പറഞ്ഞ് അടിയായി
ഒരു കുഞ്ഞു കാർമേഘത്തേം പിടിച്ച്
അപ്പനിങ്ങു പോന്നു .
"കൊച്ചു കഴുവർടാ മോനേ
ഇതൊന്നുമല്ല പാർട്ടി കോണ്‍ഗ്രസ്
ഓരോ തുള്ളിക്കും നൂറുവിത്തു മുളയ്ക്കുന്ന
മഴപ്പാടമാ നമ്മള് ."
കുശുമ്പൻ വേനലാ കൂട്ടിപ്പിടിപ്പിച്ചേന്നു
കൂട്ടം പിരിഞ്ഞവര് പറയുന്ന കേട്ടു .
വേനലിനെ തന്തയ്ക്കുവിളിച്ച അപ്പനെ
പിന്നാരും കണ്ടിട്ടില്ല .
--------------------------------