ഞാന്‍ മുകേഷ് അംബാനിയുടെ
ക്ലാസ്സ്‌മേറ്റ്‌ ആയിരുന്നു,
മൂന്നാംക്ലാസ്സില്‍ സ്കൂള്‍വിടുംവരെ.
മുകളിലേക്ക് നോക്കുമ്പോള്‍ അതാ
അയാള്‍ പറന്നു പോകുന്നു.
പറക്കുന്ന നിഴലിന്നൊപ്പം
ഞാനും ഓടി, കാശി വരെ.
അവില്‍പൊതി കയ്യില്‍നിന്നുവീണു,
ഗംഗാതീരത്തെ മനുഷ്യച്ചാരത്തില്‍.
പൂണൂലിട്ട ഒരു കാക്ക
അതെടുത്തു പാഞ്ഞു,
ഒരു പുരാണത്തിന്റെ
ജനലില്‍ ചെന്നിരുന്നു.
ഞാന്‍ അതിന്റെ വാതിലില്‍ നില്‍പ്പായി,
കുടില്‍ കൊട്ടാരമാകുന്നതുംകാത്ത്.
അപ്പോളൊരു മഴയില്‍ എന്റെ
കുടിലിന്റെ നാലാമത്തെ ചുവരും വീണു
അതില്‍ നിന്ന് ഒരു സ്ത്രീ പുറത്ത് വന്നു,
ഒരു നായ കുരച്ചു.
ഞാന്‍ മഴയില്‍ പിടിച്ചു കയറിപ്പോയി
ഒരു മേഘം എന്നെ തുറിച്ചു നോക്കി:
‘നീയോ അംബാനിയുടെ ക്ലാസ്സ്‌മേറ്റ്‌!’
ഞാന്‍ പുല്ലില്‍ വീണു ചിതറി.
നല്ല നാളുകള്‍ വന്നു.
-----------------------------------
ഒരു പുരാണത്തിന്റെ
ReplyDeleteജനലില്‍ മനോഹരം