ഹിപ്പിയും മുത്തശ്ശിയും /എൻ.വി.കൃഷ്ണവാരിയർ

വശമീശ വളർത്തിയതെന്തേ
ഹിപ്പിച്ചെറുമകനേ?
വശമീശയിലല്ലേ ശൂരത
മുത്തശ്ശിത്തള്ളേ!
മുടിയിങ്ങനെ നീട്ടിയതെന്തേ
ഹിപ്പിച്ചെറുമകനേ?
മുടിവെട്ടാൻ ചക്രം വേണ്ടേ
മുത്തശ്ശിത്തള്ളേ!
നീലച്ചിൽക്കണ്ണടയെന്തിനു
ഹിപ്പിച്ചെറുമകനേ?
ആദിത്യനെ നേരേ നോക്കാൻ
മുത്തശ്ശിത്തള്ളേ!
ആദിത്യനെ നോക്കുന്നെന്തിനു
ഹിപ്പിച്ചെറുമകനേ?
ആരേയും കൂസാതാവാൻ
മുത്തശ്ശിത്തള്ളേ!
കാലുറയിതുരിഞ്ഞു വിഴുന്നേ
ഹിപ്പിച്ചെറുമകനേ!
കാലിന്മേലൊട്ടിയതാണേ
മുത്തശ്ശിത്തള്ളേ!
പൊട്ട ഫിഡിലെന്തിനു കൈയിൽ
ഹിപ്പിച്ചെറുമകനേ?
പാട്ടല്ലേ ജീവിതസത്യം
മുത്തശ്ശിത്തള്ളേ!
നീയൊന്നു കുളിച്ചാലെന്തേ
ഹിപ്പിച്ചെറുമകനേ?
പാപങ്ങൾ കുളിച്ചാൽ പോമോ
മുത്തശ്ശിത്തള്ളേ!
നീയിങ്ങനെയാവാനെന്തേ
ഹിപ്പിച്ചെറുമകനേ?
ഞാനെന്നാൽ ഞാനാവേണ്ടേ
മുത്തശ്ശിത്തള്ളേ!
-----------------------