സങ്കടമഴ/ അജിത.ടി.ജി

മഴ പറഞ്ഞത് -
കണ്ണിലൂടെ പെയ്യമെന്നാണ്
വെയിൽ പറഞ്ഞത്
നെറ്റിയിൽ പൂക്കാം എന്നാണു
കാറ്റ് പറഞ്ഞത്
സ്വപ്നത്തിൽ തണുക്കാം എന്നാണു

പെയ്യുന്ന കണ്ണും
വിയർത്ത നെറ്റിയും
അടര്ന്ന നിശ്വാസവും
തണുത്ത സ്വപ്നവും കൊണ്ട്
ഞാൻ വന്നപ്പോൾ
നീ പറഞ്ഞത്
നിനക്കെന്നെ അറിയില്ലെന്നാണ് ..
--------------------------------

അങ്ങിനെയങ്ങിനെ ../ അജിത.ടി.ജി

അങ്ങിനെയങ്ങിനെ
ഉരലിനരികിൽ ഉലക്ക ചാരിവെച്ച
നിസ്സംഗതയിൽ
കടലിനോളം ആഴമുള്ള നിശബ്ദത
വെറുതെ കിട്ടുമ്പോഴാണ്
ഒരു ചെമ്പരത്തിയിൽ
മുഖം ചേർത്തു പ്രണയിക്കുന്ന
ഒരു പുള്ളി പൂമ്പാറ്റയെ കണ്ടു കിട്ടുക.
അങ്ങിനെയങ്ങിനെ
ആ പൂമ്പാറ്റയുടെ നനുത്ത ചുണ്ടിൽ
പറ്റിപിടിച്ചിരുന്നേക്കാവുന്ന
കടുകോളം പോന്ന പൂമ്പൊടിയെ
മനസ്സിലിട്ടു മണക്കുമ്പോഴാണ്‌
കാവിനുള്ളിലെ പകലിരുട്ടിനൊപ്പം
കവിളിൽ തൂവിയൊരു
ഇത്തിരി സിന്ദൂരത്തിന്റെ
മധുരമിപ്പോഴും ബാക്കിയാണെന്നറിയുക .
അങ്ങിനെയങ്ങിനെ
പതുക്കെയാ ഇടം കവിൾ തലോടുമ്പോഴാണ്
നിര തെറ്റിയ പല്ലുകളിലെ വേദന
പാതിരാവിലെ ചുടലാൻ കിളിയെപ്പോലെ
കോന്തി വലിക്കുന്നത്
അങ്ങിനെയങ്ങിനെയാണ്
ഞാനെന്റെ
ഉപ്പുകോരി കുഴിഞ്ഞ നഖങ്ങളെല്ലാം
കടിച്ചു കീറുന്നത്...
വെറുതേ ചോര വരുത്തുന്നത്.
----------------------------------------------------