മഞ്ഞുതുള്ളിയാല് മത്തടിക്കാനും
ചന്ദ്രരശ്മിയില് ചാരിനില്ക്കാനും
അല്ലിലംബരം പെയ്ത നക്ഷത്ര-
ത്തെല്ലെടുത്തു പൂവായ് ചമയ്ക്കാനും,
വറ്റുതേടും വിശപ്പിനെപ്പോഴും
കൊറ്റിനായ് കതിര്ക്കറ്റയേകാനും,
കാറ്റടിക്കുമ്പൊഴാടിക്കുനിഞ്ഞുള്-
ത്തോറ്റമൊപ്പിച്ചുറഞ്ഞു തുള്ളാനും,
കേളികേട്ട ശലോമോന് മഹത്വം
കോലുമെങ്കിലെന്തിത്ര മേലില്ലെ-
ന്നേകജാതന്നു സര്ഗ്ഗചൈതന്യ-
ശ്രീവിലാസം തെളിച്ചുകാട്ടാനും,
നഗ്നപാദങ്ങളേറ്റുവാങ്ങാനും
വിത്തിനുള്പ്പേറ്റുനോവാറ്റുവാനും,
ഒച്ചുകള്ക്കുള്ള സ്വര്ഗ്ഗസായൂജ്യം
സ്വപ്നമെന്നോര്ത്തു കണ്ണുപൂട്ടാനും,
നേര്ത്തനാവാ,ലലിഞ്ഞുപോം സ്വാദായ്-
ച്ചേര്ത്തു മാന്കിടാവൂറ്റിയെന്നാലും
ചാടിവീണ ശാര്ദ്ദൂലവീര്യത്തില്-
ച്ചാരുവായ്ച്ചേര്ന്നു കാടിളക്കാനും,
ചുട്ട മണ്ണിന്റെ ചൂടകറ്റാനും,
ഷഡ്പദത്തിന്നു വീടൊരുക്കാനും,
അംഗുലപ്പുഴുക്കള് മടുത്തെന്നാ-
ലന്തിയായാലൊളിച്ചിരുത്താനും,
ശല്യകാരിയാം കാക്കയ്ക്കുനേരേ
ശല്യമായ്ച്ചെന്നു കാഴ്ചപോക്കാനും,
കുഞ്ഞുവായില്പ്പതിന്നാലുലോകം
കണ്ടൊരമ്മമാര്ക്കര്ഘ്യമാകാനും,
കര്മ്മമെല്ലാമൊടുങ്ങുമായുസ്സിന്
മര്മ്മമേരകത്താല്പ്പിളര്ക്കാനും,
അന്ത്യപൂജയില് മോതിരച്ചുറ്റായ്
പുണ്യതീര്ത്ഥങ്ങളിലൂര്ന്നുവീഴാനും,
നിത്യനിര്മ്മലാനന്ദം പകര്ന്ന
നിദ്രതന്നടുക്കല്ക്കീഴടങ്ങി
അക്ഷയശ്രീയെഴും കൊടിക്കൂറ
കാഴ്ചവെച്ചുള്ള രാജാധിരാജര്
ഉച്ചിവച്ച മഹാസ്മാരകങ്ങള്
നിഷ്ഫലം പൊടിക്കുന്നായടങ്ങി
ശിഷ്ടകാലം കഴിക്കുന്നിടത്തില്-
ക്കൊച്ചുവേരില്ച്ചിരിച്ചു നില്ക്കാനും,
ഏതുവന്കരത്താലത്തിലാട്ടേ,
ഏതൊരാണവച്ചാരത്തിലാട്ടേ,
ഏതു നൂറ്റാണ്ടിനോടയില്ത്താഴും
ഭൂതമാവട്ടെ ഭാവിയാവട്ടേ,
ഭദ്രമായ്പ്പൊതിഞ്ഞേകമായ് സ്വന്തം
മുദ്രവയ്ക്കാനൊതുക്കിവയ്ക്കാനും
മന്നിലിത്രമേല്ത്താണുനിന്നാലും
പുല്ലിനല്ലാതെയാര്ക്കു സാധിക്കും?
------------------------------------------
