ഒഴുകുന്ന പുഴയിൽ നിന്നും
ഒരു കുമ്പിൾ കോരിയെടുത്ത്
ഇതെന്റെ പുഴയെന്ന്
ഞാൻ നിങ്ങളോടു പറയും.
കുഞ്ഞുമീനുകളെ കാട്ടിത്തന്ന്
നിങ്ങളുടെ ചൂണ്ടയോട് ഗർജ്ജിക്കും
നിങ്ങളതു വലിച്ചെറിയുമ്പോൾ, നമുക്ക്
പരൽമീനുകളുടെ ഭാഷ മനസ്സിലാവും.
പിന്നെ നമ്മെ
ഒരു തിരമാലയുമെടുക്കില്ല.
തേയിലക്കാടുകൾക്കിടയിൽ ഉയർന്നുനിൽക്കുന്ന
ഓറഞ്ചു മരങ്ങൾ പോലെയാണപ്പോൾ
നിങ്ങളുടെ ഹൃദയം.
ചുറ്റിനും വിരിച്ച പരവതാനിയിലേക്ക്
തിളങ്ങുന്ന മഞ്ഞഗോളങ്ങൾ അടർന്നു വീഴുമ്പോൾ
ഇതെന്റെ സൂര്യനെന്ന്
തേയിലക്കാടുകൾ പറയും.
എന്റെ ഒരു കുമ്പിൾ പുഴയിലപ്പോൾ
നിങ്ങളുടെ കുഞ്ഞുസൂര്യൻ
ഇളകിയിളകി തിളങ്ങുന്നതു കാണാം.
----------------------------------------------------------
