ഭര്ത്താവിനു വായനാമുറി
വിവേകമില്ലെങ്കിലും
ഒരല്പം
വിവരമുണ്ടാകാന്.
ഭാര്യയ്ക്കൊരു മേക്കപ്പ് മുറി
സ്വന്തം മുഖം കാട്ടി
കണ്ണാടിയെയും
ഭയപ്പെടുത്താന്.
മകനുള്ളത് കമ്പ്യൂട്ടര്മുറി
വീട്ടില്
മിണ്ടാട്ടമില്ലെങ്കിലും
ലോകവുമായി
സംവദിക്കാന്.
മകള്ക്കൊരു ഗോസ്സിപ്പ് മുറി
മൊബൈലിലൊഴുകുന്ന
ചൂടന് കഥകളുടെ
സെര്വര് റൂം.
മുറിയില് നിന്നും
മുറിയിലേക്ക്
ഫോണിലൂടെ
മുറിയന് സന്ദേശങ്ങള്.
അതിനിടയില്
അമ്മയ്ക്കും
ഒരു മുറിയുണ്ട്.
ചുമരുകളില്ലാത്ത
അതിരുകളില്ലാത്ത
വിശാലമായ
മനസ്സിന്റെ സ്നേഹമുറി.
അതില്
ഒറ്റപ്പെടലിന്റെ
ആരും കാണാത്ത
ആഴത്തിലൊരു മുറിവും.
-----------------------------
