നീ തേടുമിടങ്ങൾ / നന്ദിതാ ജോസ്

നീ തിരയുമിടങ്ങളിൽ ഞാനില്ല
ഞാനിവിടെയുണ്ട്...
ഒരു കുഞ്ഞു തൂക്കണാം കുരുവിയുടെ 
ചിറകിൻ തുടിപ്പിൽ
ഒറ്റത്തളിരിലയുടെ
തല നീട്ടത്തിൽ,
മഴ-വെയിൽ
നിഴലാട്ടങ്ങളിൽ
പൂമൊട്ടിന്റെ
ചാഞ്ചാട്ടങ്ങളിൽ...

നീ തിരയുമിടങ്ങളിൽ ഞാനില്ല
ഞാനിവിടെയുണ്ട്,
തുമ്പിച്ചിറകുകളുടെ
മിന്നൽ വേഗങ്ങളിൽ,
അപ്പൂപ്പൻ താടികളുടെ
ആകാശക്കാഴ്ചകളിൽ...
പിന്നീടൊരിക്കലെന്നു
മടക്കിവെച്ച
പുസ്തകത്താളിൽ,
ചേർക്കാൻ മടിച്ച്
തൂകിക്കളഞ്ഞ വർണ്ണങ്ങളിൽ.
എന്നിട്ടും,
എന്തിനാണ്‌
എന്നെ നീ എപ്പോഴും
മുല്ലപ്പൂമണത്തിലും,
കണ്മഷിക്കോണിലും,
പാദസരക്കിലുക്കത്തിലും
കാൽനഖച്ചിത്രങ്ങളിലും
തിരയുന്നത്...?
നീ തേടുമിടങ്ങളിൽ ഞാനില്ല.
------------------------------