മഴമുടിയഴിച്ചിടം
തെളിവെയിലൊളിച്ചിടം
കരിയില തുവര്ത്തിയി-
ട്ടകംപുറം വകഞ്ഞിടം .
ചിരിത്തെന്നല് പടര്ന്നിടം
വഴിത്തെയ്യം വരും മുമ്പേ
വെളിച്ചവുമിരുട്ടും ചേര്-
ന്നൊളിച്ചോട്ടം പഠിച്ചിടം .
വഴിത്തെയ്യം വരും മുമ്പേ
വെളിച്ചവുമിരുട്ടും ചേര്-
ന്നൊളിച്ചോട്ടം പഠിച്ചിടം .
മണല്ചിത്രം വരച്ചിടം
മുകില്ചോര തെറിച്ചിടം
മരംകോച്ചും തണുപ്പത്തു
വിരല്പത്തും വിറച്ചിടം .
മുകില്ചോര തെറിച്ചിടം
മരംകോച്ചും തണുപ്പത്തു
വിരല്പത്തും വിറച്ചിടം .
ഉടല്കൊത്തി വലിച്ചിടം
ഉളിപ്പല്ലാല് മുറിച്ചിടം
നിറംതേച്ച നിരത്തിന്മേല്
കരിങ്കോലം നിരന്നിടം .
ഉളിപ്പല്ലാല് മുറിച്ചിടം
നിറംതേച്ച നിരത്തിന്മേല്
കരിങ്കോലം നിരന്നിടം .
കടിച്ചൂറ്റിക്കളഞ്ഞിടം
വിഴുപ്പെല്ലാമെറിഞ്ഞിടം
വിളക്കിന്മേല് കുടം താഴ്ത്തി
കുലം പാടിപ്പൊലിച്ചിടം .
വിഴുപ്പെല്ലാമെറിഞ്ഞിടം
വിളക്കിന്മേല് കുടം താഴ്ത്തി
കുലം പാടിപ്പൊലിച്ചിടം .
തലത്തൂവല് വിരിഞ്ഞിടം
കഴുത്താഴം മുറിഞ്ഞിടം
കലക്കപ്പെയ്ത്തിരച്ചേറി
കിടക്കാടം മറഞ്ഞിടം .
കഴുത്താഴം മുറിഞ്ഞിടം
കലക്കപ്പെയ്ത്തിരച്ചേറി
കിടക്കാടം മറഞ്ഞിടം .
മരച്ചക്രം ചിലന്തിക്കായ്
വലനെയ്തു പുലര്ന്നിടം
മരിച്ചില്ലെന്നുറപ്പിക്കാ-
നുറക്കപ്പിച്ചുരച്ചിടം !
വലനെയ്തു പുലര്ന്നിടം
മരിച്ചില്ലെന്നുറപ്പിക്കാ-
നുറക്കപ്പിച്ചുരച്ചിടം !
എനിക്കും താ വിരല്തുമ്പി-
ലൊരു നൂല്ത്തുമ്പിഴ ചേര്ത്തു
കറക്കട്ടെ മരച്ചക്രം
മരിച്ചിട്ടില്ലിതേവരെ !
ലൊരു നൂല്ത്തുമ്പിഴ ചേര്ത്തു
കറക്കട്ടെ മരച്ചക്രം
മരിച്ചിട്ടില്ലിതേവരെ !
-------------------------------------------------
