അപായം /ജി.എസ് .ശുഭ

ഒരല്‍പനേരത്തേക്ക്
മറ്റൊരാളാകുവാന്‍
തീവണ്ടിയിലൊരു പകല്‍സഞ്ചാരം.
അപരിചിതര്‍ക്കുമുന്നില്‍
ഏറെ പരിഷ്കൃതയാകും.
കടലുണ്ടിയിലെ പക്ഷികളെ
വറ്റിവരണ്ട നിളയെ
വിദേശിയായി തിരയും.
ദുഷിച്ച ഏതെങ്കിലും ഒരോര്‍മ
ചങ്ങല വലിക്കുംവരെ
പഴയ ചില കുറ്റിക്കാടുകള്‍ കയറിയിറങ്ങും.
യാചകര്‍ക്ക് കരുണ
അശരണര്‍ക്ക് അനുകമ്പ.
പുറത്ത് പിന്നിട്ട ആകാശങ്ങള്‍ കണ്ട്
രഹസ്യമായി അഹങ്കരിക്കുമ്പോഴാവും
ഇതേ തീവണ്ടി തട്ടി
രണ്ടായി പിളര്‍ന്നവര്‍
നിലവിളിയായെത്തുക.
അടുത്ത സ്റ്റേഷനിലിറങ്ങി
ബസില്‍ കയറി
പഴയ ഞാനാകും
തിരികെ പോരും.
--------------------------------------------

എന്നിട്ടും / ജി.എസ് .ശുഭ

ഒരൊറ്റ കിലുക്കം മതി
പിടിയിലാകുവാന്‍
ഊരിമാറ്റി ഞാനാ
കൊഞ്ചുന്ന കൊലുസുകള്‍ .

വലിച്ചെറിഞ്ഞു
നിറമുള്ള ചേലകള്‍
കല്ലുവെച്ച മൂക്കുത്തി
ചൂടിക്കാനൊരുക്കിയ പൂമാല .

ആകാശം കാണിക്കാതെ
പൂമ്പാറ്റയെ കാണിക്കാതെ
ആധിയുടെ ചിറകിന്നടിയി -
ലുറക്കിക്കിടത്തി .

സ്വപ്നത്തിലും
പൊട്ടിച്ചിരിക്കരുതെന്നും
മേനിയിളക്കരുതെന്നും
താരാട്ടിനൊപ്പം
ചൊല്ലിക്കൊടുത്തു .

എന്നിട്ടുമെങ്ങനെയിവളെ
നിത്യേന കണ്ടെത്തി
പിച്ചിച്ചീന്തി
പലപൊത്തുകളിലൊളിപ്പിക്കുന്നു ?