ഉണ്ണീ, ഉഷസ്സിങ്ങെത്തിപ്പോയ്
കണ്ണുതുറക്കുക കണ്മണിയേ.
വിൺപൂങ്കാവു വെടിഞ്ഞെത്തും
പൊൻ പൂമ്പാറ്റകളെന്നതുപോൽ
തെരുതെരെ വന്നു പരക്കുന്നു
നറുവെയിലൊളി തൻ കുഞ്ഞലകൾ.
ചാമ്പി മയങ്ങിയ പൂപോലെ
കൂമ്പിയിരുന്നോരുലകെല്ലാം
പുതിയോരഴകൊടു വിരിയുന്നു
പുലർ കാലത്തിൻ പുഞ്ചിരിയാൽ.
മുല്ലപ്പൂവിൻ തൂവിതളിൽ
വെള്ളപ്രാവിൻ പൂഞ്ചിറകിൽ
മംഗളനർത്തനമാടുന്നു
കൺകുളിരരുളും കതിർ നിരകൾ.
പൂഴിത്തരിയും പുൽക്കൂമ്പും
പൂമുകുളങ്ങളുമെന്നോണം
നിന്നുടെ പിഞ്ചുകരൾക്കാമ്പും
പൊന്നിൻ പുലരിയിലിളകട്ടെ.
---------------------------------
