നിത്യവും ഒരു വാക്ക് വെച്ച് പഠിക്കുക
ഉപദേശിക്കുമായിരുന്നു
പണ്ട് അധ്യാപകൻ
അങ്ങനെയെങ്കിൽ
ഒരു മാസം മുപ്പത് വാക്കുകൾ
കൊല്ലത്തിൽ മുന്നൂറ്റി അറുപെതിയെട്ടു വാക്കുകൾ
രണ്ടാംശനി ഓണം വിഷു ബക്രീദ്
എത്ര ചേറികൊഴിച്ചാലും പഠിക്കാം
ആണ്ടിൽ പത്തുമുന്നൂറു വാക്കുകൾ
ഇപ്പോൾ നിത്യവും മറക്കുന്നതെത്ര
ചെമ്പോത്ത് ഒരു നല്ല വാക്ക് കൂടിയാണ്
മറന്നിട്ടെത്ര കാലമായി
മെച്ചിങ്ങ മറ്റൊന്ന്
മുരിങ്ങ കലം മുറം വട്ടോറം
കമ്മ്യൂണിസ്റ്റ്പച്ച മൈലാഞ്ചി
കോൽക്കളി തായംകളി
ഉരൽ അമ്മി കുഴഞ്ഞു പോകുന്നു
ഓർമയുടെ കിണറ്റിലേക്ക് ആഴ്ത്തി
പാളയും കയറും
ചുറ്റിപിടുക്കുന്നില്ല പാതാളക്കരണ്ടിയിലും
ഊർന്നുപോയവ
രക്ഷപ്പെട്ടു പോകുന്നു തല്ക്കാലം
അച്ചാറു കമ്പനിക്കാരുടെ കനിവിൽ
കണ്ണിമാങ്ങ
മധുരിപ്പിക്കുന്നു പ്രമേഹം
നെല്ലിക്കയെ പാവക്കയെ
താങ്ങി നിർത്തുന്നു സ്മിർനോഫ്
ചെറുനാരക കാലുകളെ
ഉദ്ധാരണക്കുറവ്
നായ്കൊർണ്ണച്ചെടിയെ
വാക്കുകളാണ്
ഉപ്പ ആദ്യം മറന്നു തുടങ്ങിയത്
പിന്നെ വസ്തുക്കൾ
അവസാനം അവരവരുടെ പേരുകളെന്നു
അനുജനും ഞാനും പോരടിക്കുമ്പോൾ
കിടാങ്ങളെ പോലെ വഴക്ക് കൂടുന്നോ
ഉമ്മയുടെ ശാസനയിൽ
രക്ഷപ്പെട്ടുപോകുന്നു
കുടുംബത്തോടൊപ്പം
രണ്ടു വാക്കുകൾ
വാക്ക് എന്നതിന്
നടത്തം എന്നാണ് അർത്ഥമെന്ന്
മക്കൾ പോരിനു വരുമ്പോൾ
മറവി ഒരു ഇതാണെന്ന്
എന്തോ പറയുമല്ലോ
ഒരു ഇതാണെന്ന്
ഒരു ഒരു..
-----------------------------
