അഹം / ലൂയിസ് പീറ്റർ

നിള പോലെയാണിന്നു ഞാൻ
ഒഴുകാനാവുന്നില്ല
ആരോ എന്നെ കോരിയെടുക്കുന്നു
നിശ പോലെയാണിന്നു ഞാൻ
ഉറങ്ങാനാവുന്നില്ല
ഒരു നിലാവ്‌ എന്‍റെ മിഴികളിൽ
അണയാതെ നിൽക്കുന്നു
ചതിയനാണിന്നെന്‍റെ ദൈവം
അതിരാവിലെ
ഒരു കഠിന വേദന കരളിൽ തന്നു
മൊത്തിക്കുടിക്കേണ്ട
തൊട്ടുകൂട്ടാൻപോലും അല്പം
വിഷം തന്നില്ലയൊപ്പം
ഹേ, ബാംസുരി
നിന്റെ ഇടറിയ ജപശ്രുതി
ഇനിയുമെന്‍റെ കാതിൽ പകരരുത്‌ .
----------------------------------------------

അത്തിമരം / ലൂയിസ് പീറ്റർ

ഇന്നലെപ്പോലും എന്നെ ഞാനൊരു
ഇലയില്ലാ മരമായ്‌
ഓർത്തുപോയിട്ടുണ്ട്
ശിഷ്ടം , ശിഖരങ്ങളില്ലാതെ
തടിയും തായ് വേരുമില്ലാതെ
വിത്തും പിറവിയുമില്ലാതെ
ഞാൻ മാത്രം എന്തിനാണിങ്ങനെ
തനിയെ നില്ക്കുന്നത്...
ശപിച്ചവൻ കടന്നുപോയി
കുരിശിലേക്കും കുഴിയിലേക്കും
ഞാൻ കണ്ടിട്ടും അറിഞ്ഞിട്ടുംപോലുമില്ലാത്ത
സ്വർഗത്തിലേക്കും...
എന്നെ വെട്ടി വീഴ്ത്താൻ കഴിവുള്ളവന്
ഇതാ ഞാനൊരു ബലമുള്ള കമ്പ്
സമ്മാനമായ്‌ നൽകുന്നു,
ഒടിഞ്ഞതെങ്കിലും ഒതുക്കമുള്ളത്
ഒരുക്കമുള്ളത്!
ഇന്നലെപ്പോലും എന്നെ ഞാനൊരു
ഇലയില്ലാ മരമായ്‌
ഓർത്തുപോയിട്ടുണ്ട്
ശിഷ്ടം , ശിഖരങ്ങളില്ലാതെ
തടിയും തായ് വേരുമില്ലാതെ
വിത്തും പിറവിയുമില്ലാതെ
ഞാൻ മാത്രം എന്തിനാണിങ്ങനെ
തനിയെ നില്ക്കുന്നത്...
ശപിച്ചവൻ കടന്നുപോയി
കുരിശിലേക്കും കുഴിയിലേക്കും
ഞാൻ കണ്ടിട്ടും അറിഞ്ഞിട്ടുംപോലുമില്ലാത്ത
സ്വർഗത്തിലേക്കും...
എന്നെ വെട്ടി വീഴ്ത്താൻ കഴിവുള്ളവന്
ഇതാ ഞാനൊരു ബലമുള്ള കമ്പ്
സമ്മാനമായ്‌ നൽകുന്നു,
ഒടിഞ്ഞതെങ്കിലും ഒതുക്കമുള്ളത്
ഒരുക്കമുള്ളത്!
--------------------------------

ഭൂപടം ഒരു നുണയാണ് .. / ലൂയിസ് പീറ്റർ

ഭൂപടം ഒരു നുണയാണ്
എന്‍റെ കണ്ണുനീര്‍പ്പുഴകളോ
കരളെരിഞ്ഞുതീര്‍ന്ന
കനല്‍വഴികളോ അതിലില്ല
ഉച്ചസൂര്യന്‍ തിന്നുപോയ
എന്‍റെ നിഴലോ
വ്യഥ കടലായിരമ്പിയ
പ്രിയസഖിയോ ഇല്ല
ഭൂമി ഒരു സത്യമായിരിക്കെ
ഭൂപടം മാത്രമെന്താണിങ്ങനെ
നുണയായിപ്പോകുന്നത്?
--------------------------------