നീല എന്ന പെണ്കുട്ടി ഉറങ്ങുകയാണ്.
ഒരു കാലിഡോസ്കോപ്പിന്റെ മുഴുവന്
വര്ണരാജികളും സ്വപ്നം കാണുകയാണ്.
നീല ഒരു വാല്ക്കണ്ണാടിയാണ്
വളപ്പൊട്ടിന്റെ മുനയാണ്
വാനിന്റെ തേനാണ്
പുല്മേടുകളുടെ കള്ളത്തരമാണ്.
നീല നിര്മ്മലയാണ്
അമലയാണ് നീര്ത്തുള്ളിയാണ്
നീറ്റില് കുളിക്കും മീന് കുഞ്ഞുങ്ങളാണ്.
നീല നിലാവാണ്, നിനവാണ്
സ്വപ്നത്തിന്റെ വനമാണ്
ദര്ഭ തിന്നുന്ന പുള്ളിമാനാണ് .
നീല ചുഴിക്കുത്തുള്ള കയമാണ്
നദീമുഖമാണ്
കടലിന്റെ തോലാണ്
മിന്നിപ്പായുന്ന കൊതുമ്പുവള്ളമാണ്
കാറ്റിന്റെ കപ്പല്പ്പായാണ്.
നീല ഉണരാതിരിക്കട്ടെ
നീലക്കണ്ണുകള് തുറക്കാതിരിക്കട്ടെ
കവിതയുടെ കാലിഡോസ്കോപ്പില്
ചിത്രങ്ങള് മങ്ങാതിരിക്കട്ടെ.
---------------------------------
