ഒറ്റ നിമിഷത്തിലീ പ്രപഞ്ചം
പെട്ടന്നസുന്ദരമായി മാറും
അത്രയേ സംഭവിക്കുന്നതുള്ളൂ,
അത്രയേ സംഭവിച്ചിട്ടുമുള്ളൂ.
തുമ്പികള്‍ കൊമ്പുള്ള ലിംഗങ്ങളായ്
ചെമ്പകപ്പൂവില്‍ കവച്ചിരിക്കും
പൂമ്പാറ്റ പട്ടുകുപ്പായമിട്ട
ചെറ്റയാം കേവലകീടമാവും.
മെയ്യില്‍ നിന്നല്‍പ്പമുദിച്ചു പൊങ്ങും
മൊട്ടുകള്‍ ഒറ്റുകാരായി മാറും
എണ്ണമിനുപ്പും മുഖക്കുരുവും
പെണ്ണെന്നു നിന്നെയസാധുവാക്കും.
നോട്ടങ്ങള്‍ തന്നുടെ മഞ്ഞളിപ്പും
വാക്കിന്റെ മുള്ളും വളിപ്പുമെല്ലാം
എത്രയ്ക്കറക്കുന്നതാണ്‌ ലോകം
എന്ന മട്ടപ്പോള്‍ തിരിഞ്ഞുനില്‍ക്കും.
പത്രങ്ങളാക്രിക്കടയില്‍ പോകും
ചാനല്‍ കഴുകും പറന്നുപോകും
പിന്നെ നീ പിന്നാമ്പുറത്ത് നില്‍ക്കും
അമ്മ തുണികളടിച്ചലക്കും.
നാറി മുഷിഞ്ഞ വിഴുപ്പില്‍നിന്നും
ചേറും ചെളിയുമൊഴിഞ്ഞുപോകും
സൂര്യവെളിച്ചത്തിലാത്തുണികള്‍
നേരും വെളുപ്പും തിരിച്ചെടുക്കും.
അത്രയേ സംഭവിക്കുന്നതുള്ളൂ,
അത്രയേ സംഭവിക്കാവതുള്ളൂ.
No comments:
Post a Comment