എന്റെയുള്ളിലൊരു കുട്ടിയുണ്ട്
ഉമ്മറപ്പടിയില്‍ തെന്നിവീണും
യക്ഷിയെക്കിനാക്കണ്ട് മുള്ളിയും
അമ്മമാറിലെ ചൂടേറ്റ് പനിച്ചും
അച്ഛന്‍റെ കണ്ണേറ്റ് രാശികെട്ടും
മാഷിന്‍റെ ചൂരല്‍ത്തുമ്പാല്‍ പുളഞ്ഞും
വളര്‍ന്നു വലുതാവുന്ന കുട്ടി .
എന്റെയുള്ളിലൊരു പട്ടിയുണ്ട്
ഉടയോന്റെ കാലുനക്കി അന്നം നേടിയും
കന്നിവെറിയാലോരിയിട്ടും
കള്ളന്‍റെ കവണയേറ് ഭയന്നും
പൂച്ചയ്ക്ക് മുമ്പില്‍ മിടുക്കനായും
കുരയ്ക്കുന്ന കടിക്കാത്ത പട്ടി .
എന്റെയുള്ളിലൊരു കവിയുണ്ട്
ക്രൌഞ്ചമിഥുനങ്ങള്‍ക്ക് ചിതയൊരുക്കി
വിഷപ്പാമ്പുതീണ്ടിയ മനസ്സുമായി
കാടുവെടിഞ്ഞു കാട്ടുദേവിയെ മറന്ന്‌
വഴിയായ വഴിയൊക്കെപ്പിഴച്ച്
ബോധിവൃക്ഷച്ചുവടുതേടി
അലഞ്ഞുതിരിയുന്ന കവി .
എന്റെയുള്ളിലൊരു ഞാനുണ്ട്
ചുമലിലെന്നോ കയറിക്കൂടിയ
വേതാളച്ചോദ്യങ്ങളാല്‍ നടുങ്ങി
ഇടയ്ക്കിടെ പുറത്തുചാടാന്‍
വെമ്പിയെന്നും പരാജയപ്പെടുന്നവന്‍ .
No comments:
Post a Comment