അമ്മക്ക് ഞാന്‍ തിരികെ കൊടുത്തത്
മൂര്‍ച്ചയേറിയ മോണ കൊണ്ടുള്ള ഒരുമ്മ
കുറുക്കുകൊണ്ട് മുഖത്തൊരു പൂത്തിരി
നേര്‍ച്ചകള്‍ക്കു പകരം പൊട്ടിയ കാല്‍ മുട്ട്
പനികിടക്കയിലെ ശാഠ്യങ്ങള്‍
ആശുപത്രിയിലെ ഉറക്കമൊഴിപ്പുകള്‍
കുറഞ്ഞമാര്‍കിന്നു ആദ്യത്തെ നുണ
തെറ്റിയ മുടിപിന്നലിന്നു ഇടയിലൂടെ
കൂര്‍പ്പിച്ച ഒരു നോട്ടം
നീലം പടര്‍ന്ന കുപ്പായത്തിനു പകരമായി
ഒരവധി പ്രഖ്യാപനം
ഒലിച്ചിറങ്ങിയ കറിപാടിന് പകരമായി
തുറക്കാത്ത ചോറ്റുപാത്രം
എന്റെ കുട്ടീ എന്ന വിളിക്ക് പകരമായി
വെള്ളിയാഴ്ചയിലെ വയസറിയിക്കല്‍
പടര്‍ന്നു കയറിയ ആധിക്ക് പകരമായി
തുടുത്തു നിന്ന മുഖക്കുരു
കന്നിപ്രണയത്തിന്റെ ബാധയൊഴിപ്പിച്ച മന്ത്രവാദിക്ക്
ശൂന്യമായൊരു നോട്ടം
നിറപറക്കും നിലവിളക്കിനും മുന്നില്‍
മനസില്ലാത്ത , പട്ടില്‍ പൊതിഞ്ഞ ശരീരം
എന്റെ പ്രാരാബ്ധതിന്റെ കൊച്ചു പലഹാരപ്പൊതികള്‍
അടിവയറ്റിലെ നേര്‍ത്ത ചിറകടിഒച്ചയുടെ ആകുലതകള്‍
കവിളിലെ വിളര്‍പ്പ്, മനസിന്റെ വേണ്ടായ്ക
എഴുമണികൂര്‍ നീണ്ട കാത്തിരിപ്പ്‌
അമ്മക്ക് ഞാന്‍ തിരികെ കൊടുത്തത്
പനിനീര്‍ പൂ പോലത്തെ രണ്ടു കാലടികള്‍
തൂവലുപോലത്തെ കവിളിണകള്‍
നിഷ്കലങ്കതയെ കയ്യേറ്റു വാങ്ങാനുള്ള അവസരം
ഞാന്‍ അമ്മക്ക് തിരികെ കൊടുത്തത്
എന്റെ അമ്മയുടെ ബാല്യമായിരുന്നു.
എന്റെ അമ്മക്കിപ്പോള്‍ എന്നിലെ അമ്മയുടെ അതേ പ്രായം
No comments:
Post a Comment