ഉമ്മയാണോ ,
അബൂബക്കറിന്റെ ഉമ്മ ?
- ഫോണ്‍ മുഴങ്ങുന്നു .
അതെ , അബൂബക്കറിന്റെ
പൊന്നുമ്മ തന്നെ
നിങ്ങളാര് , ഓന്‍റെ
ചങ്ങായിയാ ?
വെണ്ടപ്പെട്ടൊരാള്‍ ,
എവിടെ നിങ്ങളുടെ
പുന്നാര മോന്‍ ?
എവിടെയോ , ഈ
ഭൂമീലെവിടെയോ ,
എന്താണ് കാര്യം ?
മറ്റെങ്ങുമല്ലവന്‍
കശ്മീരില്‍ , ഇന്ത്യയുടെ
തലേക്കെട്ടഴിക്കാ -
നാണു പൂതി
ബ്ലഡി റാസ്ക്കല്‍ !
എന്‍റെ പൊന്നുമോനെ
റാസ്ക്കല്‍ എന്നു വിളിക്കും
പൊലീസാണല്ലേ ?
കയ്യൂരിലെ പഴയ
അബൂബക്കറിനെപോല്‍
എന്തെങ്കിലും ചെയ്തുവോ
പൊന്നുമോനബൂബക്കര്‍ ?
ചെറുപ്പമല്ലേ , ഈ പ്രായത്തിലല്ലേ
എന്തെങ്കിലുമവര്‍ ചെയ്യേണ്ടത് ?
അക്രമമതിക്രമമെന്തെങ്കിലും
ചെയ്തുവോ പൊന്നുമോനബൂബക്കര്‍ ?
എവിടെയുണ്ടവനിപ്പോള്‍ , എന്തുചെയ്ത -
വനെ നിങ്ങള്‍ , മയ്യിത്തു കാണാന്‍ വരാമെന്നോ ?
*
ഉമ്മാ , അബൂബക്കറിന്റെ
ഉമ്മാ , ഫോണല്ല ,
കോളിംഗ് ബെല്‍ ...
-ഭവ്യനാവുന്നു സ്ഥലത്തെ
പ്രധാന ദിവ്യന്‍
കക്ഷത്തില്‍ ഡയറിയും
സായാഹ്നപത്രവും
മുന്‍പേജില്‍ തന്നെ
അബൂബക്കറിനെ
കുറിച്ചുള്ള വാര്‍ത്ത
വളയും ഗ്രാമമിപ്പോള്‍
പട്ടാളം
ഗുജറാത്തല്ല
സ്വര്‍ഗത്തില്‍ നിന്നടര്‍ന്നു
വീണ താഴ്വര
ഉമ്മാ , മോനോ ,
ഏതബൂബക്കര്‍ എന്നു
മുഖം തിരിക്കലാണു
നന്ന് , മകനേക്കാള്‍
വലുതല്ലല്ലോ രാജ്യം ?
അങ്ങനെയാവാം
നിങ്ങള്‍ രാഷ്ട്രീയക്കാര്‍ക്ക്
എന്നാലങ്ങനെയല്ല
ഒരുമ്മക്ക്
വലുതാര് , മകനോ
രാജ്യമോ എന്ന്‌
പരീക്ഷിക്കല്ലേ
പടച്ച തമ്പുരാനേ !
No comments:
Post a Comment