ഇരുട്ടില്‍ ഒരെലി
കുഞ്ഞിനെ, പൂച്ചയെ ചൂണ്ടിക്കാട്ടി
പഠിപ്പിക്കുകയാണ്‌:
വലിയ കാഴ്ചശക്തിയാണ്‌,
എപ്പൊഴും കണ്ണില്‍പ്പെടാം.
വലിയ കേള്‍വിശക്തിയാണ്‌,
ഒരു രോമം നിലത്തുവീഴുന്ന ഒച്ചകേട്ടാല്‍
ആരുടേതെന്നറിയും.
ക്ഷമാവാരിധിയാണ്‌,
മുഴുമിക്കാന്‍ നാലും അഞ്ചും മണിക്കൂറെടുക്കും.
ദയാവാരിധിയാണ്‌,
മരിക്കാന്‍മാത്രം മുറിവേല്‍പിക്കില്ല.
സൗമ്യമൂര്‍ത്തിയാണ്‌,
മറിച്ചിടുന്നത്‌ മൃദുവായ കൈപ്പത്തികൊണ്ടാണ്‌.
നിരാശപ്പെടുത്തുകയില്ല,
പലതവണ നമുക്ക്‌ ജീവിതം തിരിച്ചുകിട്ടും.
സഹൃദയനാണ്‌,
വാലിന്റെ അവസാനത്തെ
വളഞ്ഞുനിവരല്‍വരെ
ആസ്വദിക്കും.
ഒരു തിരക്കുമില്ല,
സമയത്തിന്റെ പ്രഭുവാണ്‌. -
No comments:
Post a Comment