മഴ /രശ് മി കിട്ടപ്പ

നബീസുവാണ് കണ്ടത്
ഒരുമഴ പാത്തുപതുങ്ങി
സ്കൂൾമുറ്റത്തേക്ക് കയറിവരുന്നത്.
അവളിരിക്കുന്നിടത്തെത്തി നോക്കി
കണക്കുപുസ്തകത്തിലേക്ക് ഒരുതുള്ളി
കളിയായി കുടഞ്ഞിടുന്നത്.

അവൾ മാത്രമാണ് കണ്ടത്
ഹലാക്കുപിടിച്ച ചോദ്യത്തിന്റെ
കണ്ടുപിടിച്ച വഴികളെ മുഴുവൻ
ഒരുതുള്ളി കൊണ്ടു മഴ മായ്ച്ചുകളയുന്നത്
ഉത്തരത്തിന് വഴിയില്ലാതാക്കുന്നത്.

അവൾ മാത്രമാണ് കണ്ടത്
കണക്കുമാസ്റ്ററുടെ ഇരിപ്പുറക്കാത്ത ചൂരൽ
നബീസുവിന്റെ ഉത്തരത്തിലേക്ക്
വഴിതേടിയെത്തും മുൻപ്
തിരിഞ്ഞുനോക്കാതെ തിടുക്കത്തിൽ
മഴ സ്കൂൾമുറ്റം കടന്നുപോകുന്നത്,

മഷിപടർന്ന പുസ്തകത്തിലെ
തെളിയാത്തവഴികൾ തിരഞ്ഞുതിരഞ്ഞ്
പെയ്യാറായ നബീസുവിന്റെ കണ്ണുകളെ
അന്നേരം മതിലിനു പിന്നിൽ മറഞ്ഞുനിന്ന്
ഒച്ചയുണ്ടാക്കാതെ ചിരിച്ച്
മഴമാത്രമാണ് കണ്ടത്
മഴ മാത്രം