ഓരോ ആത്മഹത്യക്കും പിറ്റേന്ന് / സെറീന റാഫി

എഴുതി വെയ്ക്കാത്ത
ആത്മഹത്യ കുറിപ്പാണ്
ഉറക്കം നിലച്ച രാത്രികൾ

എത്ര ആഴത്തിൽ
മുറിച്ചു പരതിയാലും
എന്താണ് എന്നല്ലാതെ
എന്തിനെന്ന്  പറയുന്നില്ല
ഒരു പോസ്റ്റ്‌ മോർട്ടം റിപ്പോർട്ടും

ഓർമ്മയാണ് ഒരേയൊരു തെളിവ്
അവനവൻ മാത്രമാണ് ഒരേയൊരു സാക്ഷി

എടുക്കപ്പെട്ടു പോയ ജീവിതം
പോലത്തെ ഭാഷയിൽ തെളിവും 
സാക്ഷി മൊഴിയും  രേഖപ്പെടുത്തിയിട്ടുണ്ടാകും

പക്ഷേ
ഇരുട്ടിൽ നിലവിളിക്കൊപ്പം
ഉയർന്നു  താഴുന്ന
കത്തിവായ് തിളക്കമായി
അവയും മാഞ്ഞു പോയിരിക്കും

കൂർത്ത നഖമൊളിപ്പിച്ച
ദു സ്വപ്നങ്ങളുടെ
പതു പതുപ്പൻ കാലുകൾ
ചവിട്ടിപ്പോയ അടയാളങ്ങളിൽ നിന്നും 

അന്നും രാത്രി  പുലരുമ്പോൾ
അനേകം തുന്നലുകളുള്ള
ശരീരം പോലെ കൂട്ടി വെച്ചിട്ടുണ്ടാകും
വീടിന്നകം,
പതിവ് പോലെ