ദൈവം / സന്ദീപ്‌ ഉണ്ണികൃഷ്ണന്‍

ദൈവത്തെ കണ്ടിട്ടുണ്ടോ
എന്ന ചോദ്യത്തിന്
മേരിയുടെ മറുപടി
ഇതായിരുന്നു.
ഗൃഹപാഠം മറന്ന ദിവസം
രാധടീച്ചറുടെ അടിയൊഴിവാക്കാന്‍
മുട്ടിപ്പായി പ്രാര്‍ത്ഥിച്ചിട്ടും
ദൈവം അന്ന് ആബ് സന്റായിരുന്നു.
വേണു പറഞ്ഞു;
പ്രോഗ്രസ് കാര്‍ഡ് ഒപ്പിടേണ്ടദിവസമാണ്
അപ്പന്‍ തെങ്ങേന്നു വീണത്.
അമ്മച്ചീം പെങ്ങളും എത്ര കരഞ്ഞു
വിളിച്ചതാണെന്നോ..
എന്നിട്ടും...
ടീച്ചര്‍ കണ്ണുനിറഞ്ഞു ചിന്തിച്ചു
തന്റെ കുഞ്ഞിനെ തിരിച്ചു കിട്ടാന്‍
നോമ്പെടുത്തു പോയ
എല്ലാ ക്ഷേത്രങ്ങളിലും
ദൈവം ആബ് സന്റായിരുന്നു.
പെട്ടെന്നായിരുന്നു മുഹമ്മദിന്‍റെ സംശയം,
അതെന്താ ടീച്ചര്‍
ബുദ്ധിമുട്ടുള്ള സമയങ്ങളില്‍
ദൈവം
പതിവായി
ആബ് സന്റാകുന്നത്?